أخلاق الحبيب ﷺ

الحياء

بسم الله الرحمن الرحيم

الحديث: (إنّ الله حييٌ كريم). يستحي من عبدِهِ أنْ يرفعَ إليه يديهِ فيردَّهُما صفرًا
(الحياء شعبة من الإيمان)

القصة: الاستئذان

أسلوب شرح خُلق الحياء:

• الأدب يتضمن:
الاحترام: ربنا يقول ان ربنا يستحي مننا انه لمن ندعيه، ما يستجيب لنا، يقول كيف إنتوا عبادي اللي احبكم تطلبوني شيء ما عطبكم حأعطيكم إذا ربنا ما يبغانا نزعل لمن نطلبه شيء، يبغى يعطينا هو
هل ينفع نحن نزعل ماما لمن تطلب مننا شيء نتأخر عليها أو ما نسمع كلامها على طول، الحياء أنه أستحي أزعّل ماما، أستحي ماما تناديني أكتر من مرة

المراقبة الذاتية: الحياء لمن تكون لوحدك في غرفتك او في الجنية او في غرفة الجلسة بتلعب أو بتقرأ أو بتتفرج تلفزيون أو بتستخدم الكمبيوتر وأي أحد فجأة دخل عندك، عادي، ما تتلخبط، ما تخبي الشيء اللي بتعمله، معناه إنك بتتصرف صح، كلامتك حلوة تصرفاتك مؤدبة ومن نفسك وبتستحي لوحدك وما ترضى إنك تعمل شيء غلط، مو بس لمن في كبار جنبك، أو مو بس لمن في أحد ممكن يشوفك، دايما دائما ان تعمل الصح وكلماتك صح وتتفرج أشياء صح وتقرأ أشياء صح، وما تزعل لو أي أحد جا وشافك وشاف ايش بتعمل لأنك مؤدب و تعمل الصح دايما

أدب الحياة العملية: الحياء، انه استحي أخرج من غرفتي وسريري مو مرتب، أو ألعابي مو في مكانها، أستحي أرمي ملابسي على الأرض، استحي أرمي منديل على الأرض، أستحي أقول كلمة مو حلوة، أستحي أرفع صوتي في الكلام

اللباقة: الحياء إنك تتصرف دايما صح، انك ما ترضى تعمل شيء غلط، أو تقول كلام مو حلو، يعني تتكسف بنفسك من نفسك من قلبك من جوة عقلك، عشان اللي تحس فيه في قلبك يوصل لعقلك تفكر فيه وعلى طول يروح لجسمك تتصرف بيه

• الأهمية
كيف نحافظ على أشيائنا: مثلًا الملابس عشان تفضل مرتبة ونظيفة نحطها في الدولاب، والأشياء المهمة ما نسيبها مرمية نحطها في الأدراج، والأشياء الغالية نخبيها في الخزنة
كل ما يكون الشيء مهم وغالي ونخاف عليه، كل ما ننتبه عليه ونخبيه ومانسيبه مرمي
ربنا لمن خلقنا قال لنا انه خلقنا في أحسن صورة أحسن شكل أحسن شي من برة جسمنا ومن جوة جسمنا
خلقنا بجلد ناعم حلو، ألواننا مختلفة، مو كلنا لوننا زي بعض زي دب الباندا مثلاً
خلق لنا شعر زي التاج فوق راسنا كلنا، نهتم فيه وننتبه عليه ونسرحه دايما عشان يكون حلو ومرتب، نقدر نقصه، نقدر نطوله، نقدر نلف او نفرده، ممكن يكون بني فاتح أو بني غامق، أو أسود، أو أشقر، أو أصفر
خلقنا حلوين ومرتبين ومختلفين زي الورود والفراشات
وعشان نحن مهمين عند ربنا، ومرة مرة يحبنا ومرة مرة يخاف علينا يبغانا دايما متخابيين ولابسين ومستورين
كل ما نعرف قد أيش نحن مهمين عند ربنا، ومهمين عند ماما وبابا، ومهمين عند نفسنا، كل ما نهتم في نفسنا أكتر، وننتبه على جسمنا وشعرنا وكلنا

• الخصوصية
ربنا خلقنا وكرمنا، واعطانا مميزات مهمة عن باقي المخلوقات،
خلقنا نسكن في بيت عنده سقف وعنده باب، ونقفل علينا الباب بالمفتاح، مو بيتنا في الشجرة فوق الفروع والأغصان، أو حفرة في الأرض، أو فتحة في الشجرة، كهف في الجبل
نحتاج بيت، نسكن فيه نكون كلنا مع بعض فيه مو غرفة كبيرة في سقف كل الناس عايشين تحتها، كل عيلة لها بيت، العيلة ممكن تكون صغيرة وممكن تكون كبيرة (أم، أب، أبناء، وممكن تتمتد إلى الأجداد....)
نحتاج غرفة، ما ننام كلنا في غرفة واحدة ماما وبابا والصغار
نحتاج مكان لأشيائنا ونحب تكون أشيائنا مرتبة في مكان نعرفه عشان لاقيه، كل دا عشان نحافظ على خصوصيتنا،
عشان كدا كل بيت له باب، والباب له مفتاح، وكل غرفة لها باب
عشان كدا لازم نستأذن لمن ندخل أي غرفة، ندق الباب، نسأل إذا ممكن ندخل والا ننتظر شوية، كله عشان نحافظ على خصوصيتنا، وخصوصية أهلنا، ودا معناه مراعاة واحترام
• الستر
كلنا نعرف ان الستائر على الشبابيك للستر، عشان ما يشوفونا اللي برة البيت
الباب على كل غرفة للستر، عشان نقدر نلبس ونغير براحتنا
وباب الحمام عليه مفتاح أو قفل عشان نقفله علينا عشان ما يشوفنا أحد

ربنا خلقنا ننام في غرفة في سرير ما ننام في الجنينة بدون غطا، ما عندنا ذيل ممكن نلف حولنا ننتدفى، ولا نتغطى بورق الشجر، أو نستخبى في حفرة تحت الأرض، أو كهف جوة الجبل، كلنا نحتاج مكان هادئ ودافئ ومريج ننام فيه
ربنا خلقنا نحتاج ملابس نلبسها، تغطينا وتدفينا وتريحنا وتعجبنا، نغيرها لمن نبغى، نغيرها لمن نستحمى وكل مرة نلبس ملابس شكلنا يتغير ونفرح ونتبسط، ما عندنا فرو زي الدبدوب، أو صوف زي الخروف، أو شعر زي الأسد، أو قوقعة زي السلحفاة
عشان كدا الملابس مهمة لنا، نلبس ملابسنا من غير ما يشوفنا أحد إلا ماما لمن نكون صغار
ربنا علمنا من جوتنا انه مهم عندنا نتخبى لمن نبغى نروح الحمام، ونقفل باب الحمام علينا، بس ممكن نزهم مام تساعدنا لمن نكون مرة صغار
وكمان نحب لمن نغير ننتبه ان ما أحد يشوفنا مو لابسين أو جاهزين أو مرتبين، وكمان ما نحب نشوف غيرنا مو لابس.
ربنا خلقنا من جوة قلبنا نعرف من غير حتى ما نفكر اننا نخاف على نفسنا وعلى جسمنا ونحافظ عليه، فنتغطى ونتخبى وننتبه بنفسنا على نفسنا
وكلنا نعرف لمن نلبس كويس، الناموسة ما تقدر تقرصنا، ولو طحنا الملابس ممكن تتقطع وان شاء الله نحن ما ننجرح

وسائل وأدوات
بيت ألعاب، وعائلة.
صندوق مجوهرات، واكسسوارات
ألعاب حيوانات
بطاقة للخُلق وبطاقة للصفة. (الحياء- مؤدبة) تعلق على السبورة
وشاح بالخُلُق والحديث

الهدية
علاقة باب عليها صيغة الاستئذان عند الدخول
بطاقة حديث الخُلُق في الألبوم
بطاقة الصفة في مجموعة أسورة البطاقات


ا

المراجع

• تطبيق الدرر السنية
https://apps.apple.com/us/app/%D8%A7%D9%84%D9%85%D9%88%D8%B3%D9%88%D8%B9%D8%A9-%D8%A7%D9%84%D8%AD%D9%80%D8%AF%D9%8A%D8%AB%D9%8A%D8%A9/id599410474